SHILLONG: Meghalaya a·doko Special Intensive Revision-ko ka·ani bak gita Sombar salo, bon·kame Photo Electoral Roll-rangko chapa ka·ani ja·man, a·doko pu·ongiparang, 7.05 percent-chi komibatangaha ine Election Official-rang parakataha.
Election official-rangni parakatani gitade, a·doko SIR-ko ka·na skang, electoral roll-o gimik sak 23,49,645 pu·ongiparangni biming dongachim indiba SIR-ko dakani ja·man sak 1,65,682 voter-rangni bimingrangko den·galna nangaha.
Iani bidingo talataniko on·angengon, a·doko songdongkamgipa manderang, jemangan bilsi chu·onge dilgiparangko seokanio bak ra·na gita bilrang donga, uamanh pilakkon electoral roll-rango biming segatna aro niam gri pu·ongiparangko biming den·galna a·doko Special Intensive Revision (SIR)-ko dakaha ine a·dokni Chief Electoral Officer (CEO) BDR Tiwari, bon·kamgipa Photo Electoral Roll-rangko chapa ka·ani ja·man parakataha.
CEO-ni parakatani gitade, SIR-ko ka·ani bak gita ming 6,51,736 notice ba u·iatanirangko tariaha aro pilak case-rangon hearing-rangko matchotaha.
SIR-ko dakanio, Electoral roll-rango biming segatna gita Form 6 aro Form 6A gita sak 21,694 manderangni dorgastorangko man·soaha, gipin biaprangona apjitna gita Form 8-ni ning·o sak 2,276 manderangni dorgastorangko man·soaha, bimingrangko den·galna gita Form 7-ni ning·o sak 2,526 manderangni dorgastorangko man·soaha aro biming, bilsi aro biaprangko taridapna Form 8-ni ning·o sak 12,860 manderangni dorgastorangko man·soaha ineba CEO parakataha.
Bon·kame chapa ka·gipa electoral roll-rangoniko an·tangtangni bimingrangko, Voters’ Service Portal, ECINET mobile application ba an·tangtangni Booth Level Officer (BLO)-rang gita nipilchinaba Election Commission, voter sakantikon didiataha.
Electoral roll-rangko da·o bon·kame chapa ka·ahaoba, electoral roll-rangko nipilanio darangba watchanggalako man·jana gita bakan Special Enrolment Drive-ko a·bachengatna sienga aro ia kamko ka·anio biming dongkugijagipa manderang, nangchongmotgipa lekkarangko mesokna nanggen ineba CEO u·iataha.