Naaresto na ang umano’y sumaksak at ang utak sa ginawang pagpatay sa 20-anyos na kolehiyala sa Lipa, Batangas. Pag-amin ng isa sa suspek, inutusan siya ng mastermind na matagal na umanong manliligaw ng biktima na patayin ang dalaga kapalit ng P10,000 dahil hindi sinasagot nito.
Sa ulat ni Joseph Morong sa GMA News Saksi nitong Lunes, sinabing crime of passion ang nakikita ng mga awtoridad na motibo sa pananaksak at pagpatay sa biktimang si Jazmine Iya Martinez.
Bago mangyari ang krimen, nakuhanan ang biktima na naglalakad sa gilid ng daan sa Barangay Duhatan, nang sundan siya ng suspek na si Alyas “Lance,” na nakasakay sa motorsiklo.
Nagtamo ng limang saksak ang biktima nang matagpuan ang kaniyang katawan.
Natukoy ang pagkakakilanlan ni Lance dahil sa kaniyang kasuotan nang gawin ang krimen, na siyang suot din niya sa pinapasukang construction site.
Inamin ng suspek ang krimen at humingi siya ng tawad sa pamilya ng biktima dahil sa kaniyang ginawa.
Ayon kay Lance, natatakot at nakokonsensiya na siya. Isinuko niya sa pulisya ang mga ebidensiya sa ginawa niyang krimen, maging ang motorsiklo, patalim at cellphone.
Sinabi ni Lance, inutusan siya ng utak sa krimen na si Alyas “Kevin,” na manliligaw ng biktima, na patayin ang dalaga kapalit ng bayad na P10,000.
Ayon sa pulisya, magdadalawang taon nang manliligaw ng biktima si Kevin at hindi pa sinasagot.
“Pinilit niya po (ako) kasi sabi niya po sa akin, kapag kumanta po ako tapos nagsumbong ako sa pulis, ipapapatay po nila ako,” sabi ni Lance.
Nadakip na rin si Kevin na itinanggi naman ang paratang laban sa kaniya.
Ayon sa mga magulang ng biktima, hindi nila kilala ang suspek at hindi nila alam na may manliligaw sa kanilang anak.
Umaasa sila na mabibigyan ng hustisya ang kanilang anak sa pagkakadakip sa dalawng suspek. – FRJ GMA News