ДУШАНБЕ, 26.10.2026 /АМИТ «Ховар»/. Дастаи мунтахаби Тоҷикистон оид ба футбол дар рӯзҳои ФИФА-и моҳи ноябр дар 52-юмин мусобиқаи байналмилалии «King’s Cup 2026», ки дар шаҳри Сисакети Таиланд баргузор мешавад, иштирок мекунад.
Тавре ба АМИТ «Ховар» аз Федератсияи футболи Тоҷикистон хабар доданд, дар марҳилаи нимниҳоӣ дастаи мунтахаби Тоҷикистон бо тими миллии Умон рақобат мекунад. Умон дар раддабандии амалкунандаи ФИФА мақоми 81-умро ишғол менамояд. Дар бозии дигари даври нимниҳоӣ дастаҳои мунтахаби Таиланд ва Бруней бо ҳам вомехӯранд. Вохӯриҳои нимниҳоӣ 14 ноябр дар варзишгоҳи музофотии Сисакет баргузор мешаванд.
Ғолибони бозиҳои нимниҳоӣ ба финал роҳ ёфта, дастаҳои мағлубшуда барои ҷойи сеюм мубориза мебаранд. Рақобатҳои ҳалкунандаи мусобиқаи «King’s Cup 2026» 17 ноябр доир хоҳанд шуд.
АКС: Федератсияи футболи Тоҷикистон
Октябрь 26, 2026 09:00