Uuministeli womidhingoloko iihwa nomapashiyono owa pititha omushangwa kutya omulilo ngoka gwali gwa yaka mehala lyiiyamakuti lya gamenwa mEtosha osho gwa dhimwa thiluthilu.
Omugandji gomauyelele muuministeli womidhingoloko iihwa nomapashiyono Vilho Hangula okwa ti omulilo goka ogwa li gwa dhimwa thiluthilu komatango gOlyomakaya.
“Aakwayita yetanga lyegameno, aanilonga yOngava, aaniilonga yuuministeli wa yooloka naamboka yomEtosha osho wo oshigwana meefaalama dho popepi oya li ya longele kumwe okudhima omulilo,” ta ti ngaaka.
Ta ti, ongula yOsoondaha oya li ya kwashilipaleke kutya ka pe na mpoka pe na we omulilo, ngaashi pomahala Oberland Gemsbokvlakte, Olifantsbad, Harib osho wo Aus hoka kwali kwa tema omulilo.
Ta gwedha po kutya oya dhidhilike wo kutya omulilo ngoka inagu monitha aantu nenge iiyamukuti niimuna oshiponga.
“Omulilo ngoka inagu shiwika mpoka gwa zi, nonando kwa dhidhilikwa kutya ometenya ogu li 39°C mEtosha ngoka tagu vulu wo okueta omulilo gombaadhilila,” ta ti ngaaka.
Omukuluntuwiliki muuministeli womidhingoloko Naambo Iipinge okwa kumagidha aatalelipo opo ya kale uukeka osho wo okulandula omalombwelo noompango okuyanda iiponga.
Uuministeli owa pititha kutya pokati koomwedhi Septemba nOkotomba, ehala li thike 16% olya fikwa po komulilo.
Sha ikolela kuuyelele wa pitithwa omasiku gazi ko kuuministeli womidhingoloko, ooheketa dha thika poomilliona 1.2 odha li dha hanagulwa po komulilo moshilongo omanga kwa dhidhilikwa omililo dha thika 1 300 dha holoka oku za omumvo gwayi.
Oshifokundaneki shika osha li wo sha lopota ooheketa dhili 854 000 dha hanagulwa mEtosha oku za muSeptemba gwomumvo gwayi.
Nonando kwa lopotwa omulilo ngoka gwa ningi esiku tagu fike kEtosha osho wo omikunda dhimwe kOmusati ogwa li wo gwa pondolwa okudhimwa, aaniimuna otaya nyenyeta kutya omililo odha kala nokufaalela iimuna yawo osho wo oohambo nuulithilo wawo.
-vkaapanda@nepc.com.na
The post Omulilo mEtosha gwa dhimwa appeared first on New Era.