ONGWEDIVA – Yamwe yomalongwa ya ningi esiku moshipangelo shaCatholic shaShikuku sho anuwa yali iikulya ya ninga nayi kekulo osho oya lalekwa.
Oshiwike sha zi ko etata lyaalongwa posekundosikola Nuuyoma oya li ya taambelwa moshipangelo shaShikuku, sho yamwe yali taya kungu, nokunyuwa molutu.
Omuvali gumwe moonkudathana noshifokundaneki shika okwa ti okanona ke okamwe komwaamboka ya li ya kwatelwa moombete ashike ota pandula oshoka paife oka lalekwa. “Omwenyo paife ogu li pehala oshoka aanona oya shuna kosikola konima ya mono uuhaku. Paife aalongwa otaya vulu okulesha oshoka oye li mekonaakono,” ta ti ngaaka. Omuvali gumwe natango okwa popi kutya shoka kwa li tashi yemateke osho kwa li ya tseyithilwa kutya aanona yawo otaya nyolele ekonaakono moshipangelo.
“Ashike ota tu pandula sho ya kala po nawa, ngaashingeyi oyendji oya shuna kosikola, aashona ashike ya li ya kala mo ashike nayo okwa kwashilipalekwa kutya otaya lalekwa,”omuvali ta ti ngaaka.
Omukuluntu gwelongo mosahitopolwa shaMusati okwa ti okwa li a ningi omapulapulo nethimbo oshifo shika shaka nyanyangidhwa ka kwali a yamukula natango. “Onda pulapula uuyelele awihe, otandi ka yamukula konima yokathimbo okafupi,” ta ti ngaaka.Onkambadhala okumona omulongisikola oya hulile muunyengwi.
Omuxwaxwameki mondoolopa yaShikuku Lot Shilongo okwa ti uuministeli welongo nau nkondopaleke uukeka neyimbato lyiikulya momakulo osho wo uundjolowele unene moosikola dhoka dhina omihandjo.“Otandi ti ngaaka osho ka iikulya mbyoka ohayi topolelwa aalongwa oyendji onkene ngele oya ninga nayi otayi ehameke aanona oyendji,” ta nyenyeta ngaaka.
Ta ti, ngele iikulya oya ninga nayi nenge yili pokuninga nayi, inayi gandjwa.
-vkaapanda@nepc.com.na
The post Aalongwa ya lalekwa moshipangelo appeared first on New Era.